過關

我這個早早在大陸工作的女子，因為夠十年期早已換了新的回鄉證，趁昨天去深圳工作，過關時順道排隊再登記一次自助通道，以便下次過關快捷些，誰不知竟遇上煩人。而在這45分鐘的漫長等待中，我被迫聽著三個疑似在東X銀行做但無端端在閒日放假的兩男一女的廢話實錄！

話說我正在人潮中詛咒為何換新證要重新排隊影相和收集指膜時，身後傳來數把嘻笑的聲音，然後有一個肥男、一個中......型肥胖身形女子再加一個瘦男步至。他們呈U型把我包圍，兩個男人在我兩旁如左右喇叭，女的站立在我身後不斷高聲談話，好比5.1多聲道的效果，此行為己令我塊面立即變黑, 得左! 不過, 我本著保持好心情會靚的理念繼續耐心等候，同時無聊八卦留意他們的談話內容，節錄如下：

肥男：肥妹呢排瘦左好多喎！
中女：係呀，佢減緊肥。
瘦男：肥妹都會瘦?
肥男：係喎，成個Sa樣！
瘦男：喂！你唔好係唔係都用阿Sa來做比喻，我心目中的阿Sa又瘦又靚又可愛，肥妹點睇都唔會係Sa樣啦！
中女：唔係喎，真係瘦左。
跟住肥男在電話找了一些相出來給瘦男看，瘦男話：癡線，都唔似！佢點瘦都唔會變阿Sa!
肥男：唏，啲相在佢減肥前影梗係唔似，而家瘦左好多……
吓! 比張未瘦的相人睇有鬼用? 仲要聽到個三張野的男人讚阿Sa可愛，傻豹妹妹滴汗指數有100！

中女：我買左9月4日在Elements的溜冰券，好抵，20蚊，平時一蚊一分鐘，而家可在入面玩4個鐘，玩到你死都得。
肥男： 仲有邊個買左會去?
中女：肥妹、肥妹個妹、佢條仔、Samuel, 我同你。
瘦男：下, 肥妹而家有仔咁犀利?
中女：肥妹個妹條仔呀!
瘦男：哦......肥妹個妹好似好靚架喎!
中女：一般啫, 好瘦囉!
肥男：(對住中女講) 果日你要拉住我溜喎！跟住叫Samuel拖住肥妹，比機會佢地。
中女：癡線，我拖肥妹，你拖Samuel，哈哈哈！（傻笑達一分鐘）
瘦男：邊個係Samuel?

肥男：成日想媾佢果個同事囉！我決定果日公開我地的關係，騎騎！
中女：癡線，好朋友來咋，我唔會同你公開關係架喎！
肥男：咩呀，你話唔在東X做就公開架嘛，果日咪係時候囉！
中女：唔得，我唔要公開呀，我唔會為左一個豬欄放棄成個森林。
瘦男：哈哈！係都話放棄成個動物園啦，豬同樹點會一齊講架。
中女：我鐘意話係森林呀，佢係豬丫嘛！

跟住肥男同中女在打情罵俏, 令人打冷戰。

瘦男：其實Samuel係點樣?

中女：都幾靚仔架, 又有錢!

肥男：靚鬼, 好樣衰!

中女：痴線, 邊度樣衰呀, 你對眼有無事?

於是肥男又在電話度搵相, 三個人哄埋一齊睇...

瘦男：唔係喎! 真係幾靚仔喎! 仲有錢添呀? 甘你都係唔好公開喇, 哈哈!

中女：咪係! 佢仲爭我兩餐飯架嘛!

瘦男：係呀, 果兩餐可能會照請, 但無第三餐囉!

肥男：我唔理, 果日我要公開!等佢知佢無機。

中女：都話好朋友咯, 白痴!

瘦男：你真係信佢當你好朋友? 如果係, 佢都會戥你開心啦!

肥男：你同呢個好朋友講, 你養左個豬欄兩年喇, 哈哈哈!

三人於是笑作一團。Well, 瞄下後面個女仔個樣十分之普通, 身形亦相當圓潤, 有無有錢俊男鍾意我唔敢話無, 但佢好享受有兩個男人對佢好, 仲同正印男友拍拖兩年都話唔會公開關係因為要留條後路比自己, 我相信佢講笑居多, 但傻豹妹妹滴汗指數都有1000！

瘦男：排甘耐都未到架!

中女：係囉! 等左成半個鐘。

肥男：無, 邊度有半個鐘, 最多二十分鐘。

中女：邊止呀, 我地踏九開始排啦! (傻豹妹妹心諗: 我都係12點先到, 你點樣11點九開始排?)

瘦男：嘩! 逐個打手指膜再影相, 仲要同一段instruction播一次, 唔怪得之甘耐啦!

中女：有無搞錯呀! 做乜唔開多條隊架?

肥男：佢驚個個counter都播果段野, 唔知應該聽邉個講好, 哈哈!

中女：白痴!

肥男：係甘架啦! 呢度係大陸呀, 你以為係香港咩?

傻豹妹妹心諗, 你知係大陸就好啦, 食飯時間同你開五個counter咩, 預左要排架啦! 已經企到腳軟, 仲係度嘈住哂!

其實仲有好多對話內容, 不過真係寫唔哂, 在苦悶的排隊時間中遇上佢地環迴立體聲的對話, 幫我解悶, 仲激起我寫有史以來最長的一篇blog, 我係咪應該多謝佢地? 哈哈!

人, 真係應該苦中作樂!