今篇文, 我一定要以白話寫!
人人都話生完之後一個月對產婦來講好重要, 於是我舊年已經搵定一個阿姨來照顧我和BB坐月, 佢係經一個朋友介紹的, 面試時覺得佢都OK, 但估唔到佢返工後令我咁不滿, 搞到我都唔可以好好休息. 我唔知係自己做新手媽媽太緊張定咩原因, 總之對佢好多行為都睇唔過眼! 包括以下呢幾樣:
1. 講野超大聲: 原本我地呢個家庭的人就比較斯文同安靜, 加上有埋BB, 連睇電視都細聲左, 但呢位阿姨成日講句說話都嘈嘈閉, 聽到我都煩埋, 最大鑊係佢超多野講, 一有機會就拉住我地講呢樣講果樣, 大佬, 我請你返來同我傾計咩, 比啲空間我休息啦! 我食緊飯又講, 上緊網又講, 睇緊報紙都講, 係咪連我去厠所都仲要講丫? 已經擺到明唔想同佢搭訕, 佢仲唔收口! 我好想推介佢睇菜菜子套日劇, 果個只會做野唔出聲的家政婦原來係勁正!
2. 衞生麻麻地: 照顧初生BB都幾講衞生, 雖然成日有人話唔好太過乾淨, 但基本功都要啫! 呢位阿姨無論在煮食方面定同BB換片都好鬼"嗱渣", 試過同BB換完便便片後, 搞到裝清潔棉的盒仔同裝暖水的盒仔都沾上便便, 洗手間條抺手巾又有, 佢唔出聲之餘又唔清理, 到我入房先見到, 要即刻叫工人姐姐洗, 以免散播細菌! 其次, 成日在廚房洗野洗到周圍都係水, 又攤到一枱都係食物, 最衰係未用完一舊薑又開一舊新的, 啲野周圍擺, 搞到我老爺鬼咁嬲! 我成日睇住佢去抱BB前有無洗手, 千祈唔好搞到我個仔污糟, 否則我會發火!
3. 用量驚人: 佢只係返左兩個星期左右, 但已經用左我一整包X記龍眼, 一大包靚果皮, 一支豉油同大半支油! 我不斷同佢講我鍾意清淡口味, 唔該少油少鹽少調味, 仲有我地無抽油煙機, 最好唔好煎野, 但日日講佢日日都落好多野煮飯, 我不時要黑住面同佢講: 唔好要我成日提你, 我話左唔好落咁多野, 食到我肚痾喇! 佢竟然仲話生完有少少肚痾係正常, 我心諗, 我係食果個都無嫌淡, 你煮果個駛乜理咁多? 跟住又講一次: 少油少鹽少調味!
至於用野方面真係好離譜, 我睇過佢煮代茶, 煲果一公升水佢乜都落一大堆, 我直情問佢駛唔駛用咁多料, 佢話唔用多啲料無味架, 我又再同佢講, 我都話左唔鍾意啲野咁濃味, 佢先稍為落少幾粒紅棗龍眼, 但都可以用哂我咁多野, 我地的存貨本來夠用成個月, 佢兩個星期唔夠可以清左倉, 跟住問我駛唔駛再買. 我唔知佢咩心態, 雖然話啲野用在我身上, 要買過亦唔係好貴, 但有時唔係錢的問題, 而係需唔需要的問題, 佢比我的感覺係想快啲用哂啲野再買! 未返工時佢成日同我講話唔好買咁多乜乜物物, 但上工後我覺得佢乜都想叫我買, 甚至叫我買過個飯煲, 我真係睬佢都傻! 佢明知我得兩公婆食飯, 但就成日預到啲份量好多, 我講左好多次先叫做預返好少少, 唔駛成日剩餸, 大佬, 我應該食新鮮食物, 唔通成日叫我食隔夜餸飲隔夜湯咩, 講極都係咁, 我有時火火地都好想叫佢真係唔記得就搵本簿寫低!
至於買餸錢係另外計, 日日清數, 有時我見佢買到啲野好貴都會出聲, 喂! 我唔煮飯唔等如我唔知啲野幾錢,唔係你話幾多就幾多啫! 佢有個口頭嬋, 就係買乜都話唔平, 跟住claim錢時有啲野無單, 佢就會話而家啲野點貴點貴, 以前幾多蚊就買到, 下刪100字, 通常我都唔出聲, 計下條數過唔過份, 唔太過份我都算數, 有啲野感覺有少少離譜我會出聲, 話在我地呢邊買都係咁多咁多錢, 佢果邊做乜要賣到咁貴? 跟住佢就會有一堆理由. 老實講, 錢我就預左比, 我只係想佢知道打斧頭都唔好太過份啫.
4. 老屈工人: 我屋企有個工人姐姐, 我請佢返來係幫我唔係要來服待阿姨, 但佢成日老點姐姐煮飯同執頭執尾,有時佢話我個仔喊要抱下佢, OK! 但我個工人唔係奉旨去幫佢, 有次佢竟然責備姐姐做乜唔蒸魚灼菜, 我睇唔過眼同陪月講, 原本負責煮飯比我食果個係佢(咁高人工請佢的工作範圍之一), 我個工人只係幫下手, 我個BB無扭計唔駛成日抱, 佢可以放低我個仔一陣, 煮左飯先, 佢先走返去廚房, 否則應該一直抱阿B抱到我個工人煮完飯佢先起身! 我問佢: 乜以前做頭頭住家都有工人咩? 佢話梗係唔係, 於是我話咁你果時點樣又煮飯又照顧BB, 佢話做快手啲, 但洗野就洗得求其啲! 跟住我話咁你在我屋企都算他條, 我個工人幫你做咁多野, 佢無聲出!
其實我家姐姐都算係咁, 阿姨成日點佢沖奶, 教水比BB沖涼, 煮飯, 洗碗, 佢都無投訴, 但阿姨就成日蝦佢唔識中文, 有啲野入左姐姐數! 好似有次洗菜無切走啲菜花, 又有發泡膠碎, 阿姨見到我揀哂啲渣出來, 即刻賴係姐姐洗菜, 仲話佢唔識洗, 乜乜物物, 當時我無出聲, 我知我地個工人返左咁耐工, 呢啲野佢唔會唔知, 於是之後我問姐姐邊個洗菜, 佢話係auntie! 我信我工人, 因為我食緊飯時佢在廚房洗野, 應該唔知出面發生咩事! 其實仲有其他例子, 總之一有啲咩唔對路阿姨就話姐姐唔識, 而佢自己就乜都無做錯!
5. 專業定靠害: 當初決定請個陪月, 係覺得自己有啲坐月野唔識, 不如比錢搵個專業人士返來幫手, 一來唔駛我媽咪同老爺奶奶咁辛苦照顧我, 二來老公又可以放心去返工, 但係, 慢慢我有啲懷疑阿姨所謂有10年經驗係點樣一回事, 因為佢成日向我提議埋啲怪食材, 例如黃金蝦(咸蛋, 海鮮?), 干炒牛河(炒野, 牛肉, 油膩?), 未夠12朝叫我食薑醋, 又話可以炖花膠比我食, 以我淺薄的坐月知識, 都知有啲野唔可以食住, 佢點可能叫我食? 我問佢可以食架咩? 佢每次都話:乜都可以食, 食少少唔會有問題! 咁我想話, 如果無野係唔食得, 咁我駛乜用咁多錢請你來煮飯比我食呢? 唉!
平時係姐姐開奶, 有次我叫佢自己開, 結果就出事, 奶樽在雪櫃拎出來, 凍冰冰佢求其用開水沖一沖個樽, 個奶咀仲係凍既, 我話唔得喎, 要成個奶樽用熟手沖先得, BB放落口飲架! 佢話沖左架喇! 啲開水凍啫! 下, 雪櫃果種凍同開水果種凍我地唔係唔識分呀? 到畢奶粉, 把刀亂咁用啲份量唔岩, 倒入奶樽又倒瀉哂, 跟住仲好意思話自己生手, 當時我真係忍唔住話佢唔係成日開奶架咩, 點解會生手?? 真係人都癲!
有一日, 我午睡完起身, 未夠5點出廳唔見左佢, 問工人姐姐, 話auntie走左, 下? 未夠鐘收工喎, 走左? 我跟手打比佢啦, 無人聽, 我一頭霧水, 莫非佢想唔撈? 最後佢無打返比我. 當晚我真係同老公認真商量過想炒佢魷魚, 但諗到多對手係一對手, 先至諗住捱埋之後的日子. 第二朝佢返工, 我問佢做乜未夠鐘就走, 佢扮懵話睇錯鐘, 仲話唔怪得返到屋企咁早, 佢話補返鐘比我. 我塊面黑過鑊撈, 一句聲都無回應. 坦白講, 如果你做得好地地, 你有事要早少少走, 同我講聲我唔會唔比, 但佢一句野都無講自己走左去, 又唔覆電話就真係好離譜, 呢啲係專業陪月的所為?
6. 無規無矩: 阿姨份人唔係好識咩叫"尊重", 我有時在客廰上緊facebook, check緊email, 佢竟然可以一碌木咁企在我後面睇住我整理私人野, 睇到facebook某啲相仲比返幾句評語我, 就算佢無心都好, 我老公老爺奶奶甚至我媽咪都從來唔會咁樣睇住我上網, 侵犯我私隱, 真係好難頂! 另外, 有時我在BB房試餵人奶, 佢又衝入來, 我點都唔係咁習慣人地望住我個胸囉! 仲有幾次我在自己房, 佢敲一敲房門又衝入來, 我同佢講佢敲完門等我自己開門, 佢仲話: 下, 我有敲門架喎! 我話: 係, 但你都係等我自已開門啦! 果幾次我在房泵緊奶! 而家搞到我一做私人野, 我一定要LOCK門, 否則怕佢又衝入來......
呢樣都唔止, 話說屋企個廚房係我老爺管轄的範圍, 我呢亭無飯煮婦亦樂於清閒, 從來唔搞廚房裡的一碗一碟, 正所謂有無米我都唔知既, 我咁講唔係話呢樣係一件好光榮的事, 而係我嫁入來咁耐就已經係咁, 我唔覺得佢地想我突然變得好積極煮飯, 而且在我坐緊月時就更加唔會要求我做啲乜啫. 好喇! 阿姨要煮飯一定要用廚房啦! 佢不時自己摷野用不特止, 有次仲同我話搵到啲蟲草, 問駛唔駛炖野比我食! 我話: 下, 我唔搞屋企啲藥材, 亦唔駛而家食炖野住(正常人應該會在滿月後先用藥材補身, 都唔知佢作為陪月員點解會咁問我!) 佢仲繼續講話啲蟲草好貴, 好補身, 下刪100字, 當時我幾想XYZ佢! 但我忍住, 只係話: 我唔駛補身住, 我媽咪之後會炖比我食! 莫講話唔應該食咩藥材住, 就算可以食, 以佢的習慣, 佢兩日唔駛同我用哂啲貴價食材喇! 呢啲海味野我一定唔會過佢手整, 要整我媽咪奶奶都會整, 反正佢地一早已經買定燕窩花膠鮑魚比我慢慢補身, 我根本都唔擔心無好野食!
其實仲有好多野我覺得離譜, 但我唔想自己坐緊月都咁勞氣, 寫住咁多算啦! 費事第時睇返勾起回憶都忍唔住想鬧. 講真, 請佢加埋買餸錢要駛成二萬蚊, 但我覺得好似貼錢買難受咁, 雖然客觀來睇佢都幫到我, 唔係我要睇住BB邊有時間寫呢一大篇文, 不過你問我值唔值, 我會覺得唔值得囉! 如果唔係唔想老人家辛苦, 我一定搵自己媽咪陪我坐月, 不過無計啦! 而家決定繼續用佢我亦唔可以對佢太唔客氣, 話哂佢煮飯比我兩公婆食, 又照顧我個寶貝仔, 萬一煮飯時落毒, 虐待BB咁我點搞 (講笑啫!), 而家唯一可以做就係忍, 忍到佢last day果日!
不過, 假如有朋友想搵陪月, 我一定唔會推薦佢比人, 費事害人! 如果再比我揀, 我亦一定唔會再請陪月, 邊個介紹都係咁話, 慳返啲錢比BB買奶粉尿片好過, 總之一句, 呢個搞野陪月就令我好激氣啦!
No comments:
Post a Comment