這個周末發生了一件很搞笑的事, 我估不到我媽咪有時都幾幽默!
話說我們在星期六回娘家吃飯時, 電視播出令人吐血無極限的《繼承者們》在J2台播放的廣告, 於是我問上次也有追看《來自星星的你》的媽咪這次會不會追看, 當然順勢大力推介她留意金宇彬和姜河那, 跳過李敏鎬和朴信惠那些老土情節就可以了。然後, 她問我最近還在看金宇彬嗎? 我說不是呀, 最近忙於聽ZE:A的歌, 沒空追電視劇。她說, 都不知歌詞內容, 有什麼好聽的。嘿! 我為了推廣帝國之子(還是為了重申自己其實知道歌詞大意?!), 就即場在Youtube播放了《後遺症》中文版MV給她看, 順便自己又睇一次。^o^
她見到九個男仔不斷飛來飛去, 又有大頭close-up鏡頭, 眼花繚亂, 於是(要用白話):
媽話: 呢隊嘢咁多人都唔知邊個打邊個! 你到底鍾意睇邊個? 係咪呢個? (指住大隻仔主音桐梭, 因為佢個樣都靚仔又出現最多)
我指住時完個樣: 唔係呀, 係呢個, 呢個呀, 係咪好靚仔呢? 佢做戲好好睇架! 又識拉小提琴。
媽話: 呢個? 個樣咁細個, 佢幾多歲呀?
我話: 好似27。
媽話: 咩話? 話佢20都有人信。細個到做你個仔都得喇喎, 有咩好?
我話: 你未見到佢上雜誌封面既相啫, 著咗西裝成熟啲, 無咁細路, 好靚仔! 佢第一套戲一出場, 古裝既, 秒殺呀! 你要唔要睇下啲相吖?
媽話: 青靚白淨, 都幾靚既, 但係成個女仔咁有乜好唧, 又瘦又矮, 鍾意誠俊哥咁man架嘛 (OMG! 佢只記得《天國的階梯》裡面權相佑……的肌肉! 你咪鍾意個大叔囉! 但唔好抵毁我地時完好喎)。
媽問: 咁你仲鍾意邊個呀?
我話: 無喇喎! 我淨係追住時完一個睇都睇唔切, 點留意其他人呀!
媽話: 車! 九個人先鍾意一個!
我話: 吓! 要鍾意好多個先得架咩?!
呢個時候, 小王子放低玩具加把口: 媽咪, 佢地做乜呀?
我話: 跳舞囉! 不如你一齊跳啦!
小王子左跳右跳扮佢地, 跟住我媽話: 其實果個咩完同你個仔差唔多咁cute啫, 你睇住自己個仔都一樣。
我話: 佢叫時完呀! 咩差唔多呀, 我個仔第時大個肯定仲靚仔過佢啦! (跟手抱住仔仔狂啜無限次!)
媽話: 咁我個孫梗係仲靚仔啦! (跟手抱住我仔狂啜無限次!)
無聊完畢, 以上。
其實讀書時我無沉迷過偶像, 媽咪亦好少理我鍾意咩明星。反而生了bb後比以前更留意呢批花美男(母性大發嗎?)。果日在Youtube聽了一首, 聽了又一首, 覺得以下的MV都幾好, 推介一下:
1. 後遺症: 最近好中毒的一首歌, 除了因為旋律輕快琅琅上口外, 時完是跳第一part出場舞的, 主唱和演出的部份算比較多, 所以特別鍾意(不過唔好理啲衫同化妝, 果啲花同頭飾係咩事?)。而且覺得有時睇戲真係有後遺症, 就係會好鍾意某位藝人……一排, 跟住又變心啦, 哈哈!
2. 後遺症排舞篇: 呢首幾得意, 要慢慢認邊個打邊個, 但因為時完生得細粒又瘦, 反而易認。佢企在其他高大的團員隔離(例如炯植,光熙),對腳好幼好短, 戴住鴨舌帽就好似一個小朋友 ^O^。不過呢個MV令我對他的舞技改觀, 整隻舞佢都跳得投入, 尤其尾段佢shake得幾好睇。或者只係我主觀, 當初因為睇《未生》特輯, 有一幕要佢跳舞比姜素拉睇, 佢好怕醜咁跳左幾下舞步, 當時我完全未睇過佢的MV, 只覺得佢跳得咁唔起勁既(又話係帝國之子???), 於是一路個印象係佢跳舞麻麻。加上佢個樣比人感覺文質彬彬好柔弱成個書生, 我好難想像佢勁歌熱舞個樣, 但原來都ok! 呢個視頻我係一路追住時完來睇既!
3. 風之幽靈: 我另一首大愛, 鍾意個旋律和副歌, 時完唱開頭果part, 之後都少出現, 但佢個造型麻麻, 純粹鍾意首歌。呢首炯植最突出, 但佢樣貌唔係我個type, 身材身高先係(184cm的貴公子)。
而家炯植同時完一樣大勢, 但我第一次識佢係因為《繼承者們》呢套野, 佢裡面果個角色有少少低能, 我印象太深刻, 就算某啲角度覺得佢其實都幾靚仔都好, 好難有好感! 加上佢年紀好細, 性格似足小朋友, 佢唔講嘢只睇様會好啲!
4. Here I am: 賣可愛的曲風, 唔係我杯茶, 不過總唔能夠每一首都咁跳躍, 偶然來一首佻皮小清新路線都好。佢地隻舞確係幾搞笑, 我仲叫我個仔學果款揮手。呢首好記得光熙, 佢神高神大做呢啲動作好灰諧, 但佢笑起來對眼係彎腰果(雖然應該係整容而來), 令人睇到佢都覺得開心。講下黃光熙呢個人, 佢真係好嘈, 好嘈, 好好好嘈, 仲有竟然承認自己有整容! Kwanghee c, 你係偶像團體來架, 唔怕被人詬病連累隊友(講緊時完呀)? 但又因為佢超強的綜藝細胞同埋不遺餘力去宣傳帝國之子, 為大家付出好多好多, 雖然我唔係太子妃, 但在喜歡佢和討厭佢之中, 好肯定自己一啲都唔討厭佢先!
而且, 哎, 時完, 不如你對光熙好啲啦, 我諗佢真係好愛你囉!
5. Step by Step: 終於可以慢慢認人的一首情歌, 漸漸分得清全隊人, 有啲人條件其實真係幾好, 點解佢地唔紅呢? 唉! 都係公司問題啦! 呢首MV因為把聲靚, 我覺得海歸派主音Kevin原來唔錯, 樣就唔好講, 但把聲好清脆, 而且番書仔個人傻更更好得意又sweet, 討好之選。仲有, 時完真係適合做戲, 佢既表情係咁多人之中最豐富, 最尾果度笑起來最好睇。
6. Watch Out: 輕快的歌, 好有趣的一首MV, 但成班人跑來跑去, 真係睇到頭暈。我亦發現一個現象, 就係時完好多時都被選中同女主角有特別交流, 攬攬抱抱果啲, 當然, 佢咁靚仔, 比著我都揀佢啦 (又講, 厭唔厭!)~
另外, 仲有兩隻MV想推介, 但唔係帝國之子的歌, 只係會令人認識任時完多一點:
1. 賜我一個狀元郎: 話說時完拍《擁月》後得到各方關注, 於是有粉絲做了這個MV, 把他最美好的瞬間展現。到底有幾發光令一眾雌性動物暈哂大浪? 唔多講, 睇片啦!
2. SoReal MV: 時完係呢首MV的男主角, 一個字: 好睇!
連續兩篇講任時完, 我都覺得自己傻傻地, 不過講兩篇都夠皮了, 反正呢期係鍾意睇佢, 過一排新人輩出就唔知了! 佢都就快入伍, 有機會紅, 我都想佢繼續紅落去。當完兵出來, 講唔定可以行man 少少的路線! 佢係演技偶像, 亦係一個對自己有要求的人, 我諗佢仲有得撈,時完, fighting!
p.s. 時完在香港搞的FM圓滿結束, 佢玩親民大講廣東話同唱中文歌, 好聰明! 佢唱周董首《星晴》仲唱得幾好, 咬字正過好多香港人, 睇片吧!
No comments:
Post a Comment